Abakwa sdlodlo e-kzn bathi bayaqhubeka nokukhuculula izigelekeqe emiphakathini.
Written by Phakeme Mnguni on 19 November, 2024
By: Pamella Majola
Amaphoyisa aseKZN athi ayaqhubeka nokukhuculula izinswelaboya eziwuhlupho emiphakathini.
Loku njengoba abasolwa ababili basale enkundleni ngesikhathi bedubulana namaphoyisa ku-Old Mtubatuba Road Empangeni ogwini oluseNyakatho yesifundazwe.
Laba bebefunwa amaphoyisa ngezinsolo zokubandakanyeka emacaleni okubulala.
Amaphoyisa athi uphenyo olwandulele luveze ukuthi imoto etholwe kulabasolwa yayebiwe ngesikhathi kugqekezwa emzini thizeni KwaMsane ngolwesihlanu olwedlule.
Kwesinye isigameko, abanye abasolwa abane bakhalele ngamasongo kasigonyela ngezinsolo zokugqekeza ezindaweni ezahlukene nokubalwa kuzo KwaMsane, kaHlabisa, eMtubatuba, Empangeni, eRichards Bay kanye naseSikhaleni.
Labasolwa ababalelwa eminyakeni engu 30 kuya kwengu 39 ubudala, bazovela phambi kwematshi yaseMpangeni kusasa ngoLwesithathu ngamacala okugqekeza kanye nezibhamu ezingekho semthethweni.
