Bobby Motaung uphika ekaGabadinho Mhango.

BY: Simtho Dladla

Isikhulu esiphezulu eqenjini le-Kaizer Chiefs uBobby Motaung uveze ukuthi mncane kakhulu amathuba okusayinisa umgadli waMaZulu FC, uGabadinho Mhango.

Kusanda kuqubuka amahebezi akhomba uMhango ku-Chiefs emva kokuvela ukuthi akekho ezinhlelweni zomqeqeshi omusha woSuthu uPablo Franco “Cijimpi” Martín. Okuqinise kakhulu lezizinsolo ukuthi lomdlali ubengekho emdlalweni wokuzilungiselala ukuqala kwesizini obizwa nge-Prince Mangosuthu Legacy Cup, ezinkundleni zemidlalo oLundi.

Ekhuluma nesteshi sikamabonakude I-Supersport eBotswana, uMotaung uthi njengeqembu akukho izingxoxo ababe nazo ngoMhango kodwa kukhona abadlali abazomenyezelwa iqembu khona maduze nje. URanga Chivaviro uyena kuphela umgadli okhona emabhukwini eChiefs kanti basanda kusayinisa uPule Mmodi, Mduduzi Mdantsane kanye no-Tebogo Potsane.

Amakhosi azobhekana neChippa United emdlalweni wokuqala we-DSTV Premiership ka-2023/24 eMoses Mabhida Stadium eThekwini ngesonto mhlaka 9 Agasti 2023 kanti umdlalo uzoqala ngo-4 ntambama.

image: Backpagepix