I-DA Ithi Ayijiki

By: Lindelani Mbatha

Umholi weDA uJohn Steenhuisen uthi abajiki futhi akekho ozobaphazamisa esinqumeni sabo sokuyisa ikhomishana yokhetho i-IEC enkantoko.

U-Steenhuisen usho kanjena ngenkathi ethula ngokusemthethweni umkhankaso wabo wokhetho nophinde wafaka iziqwembe eThekwini.

Lenhlangano isola i-IEC ngokwenzelela esinqumeni sayo sokuvula ithuba lesibili lokuthi amaqembu ezombusazo anikezele ngabantu abazomela izinhlangano okhethweni lohulumeni basekhaya, osekuqagulwe ukuthi luzoba ekuqaleni kuka-November.

I-ANC kanye neUDM ngezinye izinhlangano ezihlulekile ukugcina umqamlajuqu wokulethwa kwamagama kulekhomishana.

Iqembu elibusayo belizophazamiseka kakhulu kulolukhetho komaspala abangaphezu kuka-90, ukuba ithuba lesibili alivulwanga.

U-Steenhuisen uthi i-IEC ikhombisile ukuthi iwumbimbi ne ANC.

Uqhuba ngokuthi bahlela ukuwola bonke omaspala ngisho nalabo abasezindaweni zasemakhaya. Bangu-257 omasipala sebebonke okulindeleke ukuthi amaqembu ahlukene ezepolitiki ancintisane ngabo.

U-Steenhuisen uthi bazoxoxisana namanye amaqembu ukuze basebenzisane kwabanye omasipala.