I-NPA Ithi Konke Kumi Ngomumo Ecaleni Elithinta ama-Gupta

By: Sthulile Mdletshe

Uphiko lwezokushushisa kuleli, iNPA, luthi lunobufakazi obuqanda ikhanda mayelana necala elithinta umndeni wakwa Gupta kanye nohlelo lwase -Estina Dairy Farm.

Loluhlelo lwaluhlose ukuthuthukisa abalimi base Free State abamnyama nabafufusayo.

Ngokwembiko eyavela kwikhomishana ephenya ngokugwamandwa kwamandla ombuso, imali engango R287 million yakhokhwa uhlumeni kulomndeni kwasekuthi basebenzisa leli pulazi lase Estina ukushushumbisa imali emabhange ahlukene.

U-Iqbal Sharma owayeyiskhulu emnyangweni wezoLimo eFree State usenqatshelwe ibheyili mayelana naleli cala, enkantolo yaMantshi e-Bloemfontein.

Kanti uzakwabo u-Peter Thabethe kanye nezinye izikhulu okubalwa kuzo uLimakatso Moorosi noSeipati Dlamini, ababhekene necala lokukhwabanisa, kanye nokwephula iPublic Finance Management Act, bangaphandle nge bail.

Okhulumela iNPA u-Sindisiwe Seboka uthi njengamanje bazogxila ekushushiseni abasolwa abakhona njengoba isaqhubeka imizamo yokubuyisa abakwa Gupta eDubai ukuze bazoqula amacala abo kuleli.

powered by Advanced iFrame. Get the Pro version on CodeCanyon.