I-SASSA ichitha amahlebezi okuphindwa kabili kwemiholo ngo Disemba.
Written by Phakeme Mnguni on 19 November, 2024
By: Sthulile Mdletshe
Isikhungo esiholela izibonelelo zikahulumeni i-South African Social Security Agency isiwachithile amahlebezi okuthi kungase kuholwe kabili ngo December.
Lokhu kuza emuva kokuthi kube nokushayisana kwemibono mayelana nokusondelana kwezinsuku zokuhola imali yesibonelelo ngo December nango January, nokugcina kwenza abantu bacabange ukuthi bathola imali ye-bonus.
Lesikhungo sithi abahola lemali bazoyithola njengenjwayelo ngaphandle kokuthi yengezwe.
Ngo Disemba imali ikhokhwa kusukela ngomhlaka 3 kanti njengenjwayelo abazohlomula kuqala kuzoba abantu abadala, kulandele isibonelelo sokukhubazeka bese kugcina esezingane.
Kuyobe ke sekuthi ngomhlaka 3 January 2025, kuqale futhi ukuholwa kwalemali njengenjwayelo. Abahlomula lemali bayanxuswa ukuba bayisebenzise ngokucophelela njengoba kwaziwa ukuthi inyanga yokuqala konyaka iza nezindleko zokubuyela kwabantwana esikoleni kanye nokunye.
I Sassa isikuqinisekisile ukuthi awukho umholo ozophindwa kabili ngenyanga ka December.