Intukuthelo Emndenini Inkomo Ibulala Ilungu Lawo

By: Zilungile Mkhize

Umndeni womlisa wase Phoenix enyakatho yeTheku, ohlatshwe inkomo washona, uthi ufuna ubulungiswa ngokuwehlele.

Lomndeni uthi usakhungathekile namanje ngalomshophi owehlele ubaba wekhaya, uSeelan Chetty, obeneminyaka engu-71 ubudala.

U-Chetty ubesendleleni eya kwakhe ngesikhathi evinjezelwa inkunzi yenkomo evele yambhokoda ngezimpondo, .inaphaza ngisho nezimpahla abezigqokile.

Indodana yakhe ithi akalitholanga ngisho nethuba lokubaleka njengoba egcine ngokushonela endaweni yesigameko.

Ithi okubuhlungu ukuthi namanje akwaziwa ukuthi ngubani umnikazi walezinkomo ezihlezi zizitanasela phansi phezulu emigaqweni yase Westham, ePhoenix.

Iqhuba ngokuthi ngisho nomkhandlu weTheku imbala sewake wabikelwa ngalemfuyo engundingasithebeni, kodwa nawo awukaze umthole umfuyi wayo.