Kuvalelwe Abangu-14 Echwebeni Ngenxa yeCOVID-19

By: Zilungile Mkhize

Abakwa Transnet National Ports Authority sebekuqinisekisile ukuthi abasebenzi abangu-14 abebesemkhunjini, i-Eaubonne, abafike eThekwini bevela eNdiya ngeSonto, batholakale beneCOVID-19.

Lomkhumbi wasuka eNdiya ezinsukwini ezingu 17 ezidlule ulibangise kuleli.

Kumanje bonke abasebenzi bawo bavalelwe ngabodwana khona echwebeni laseThekwini, ngokulandela imigomo ye COVID-19.

Umnyango wezempilo kuzwelonke uthi usiqaphile isimo salabasebenzi, njengoba eNdiya izakhamuzi sezibhuqabhuqwa olunye uhlobo olunzima lwe COVID-19 oluhlukile kulawo atholakala kuleli lengabade.

Kanti iNational Ports Authority isiphinde yaqinisekisa nokuthi unjiniyela omkhulu walomkhumbi usedlulile emhlabeni ngenxa yesifo senhliziyo.