U-Zikalala Ubhoboka Ngokusocongana Kosopolitiki

By: Bongani Gina

Usihlalo we-ANC KwaZulu-Natal uSihle Zikalala uthi kuzosungulwa izithangami lapho kuzodingidwa khona ngodaba lokubulawa kosopolitiki, amakhosi nezinduna.

U-Zikalala usho lokhu ngesikhathi ethula inkulumo yakhe yokuvala umhlangano walenhlangano, iProvincial Lekgotla, ebiqhubeka eThekwini.

Ngenyanga eyedlule kubulawe obeyikhansela le-ANC eThekwini, uMinenhle Mkhize, owadusthulwa ngabantu abangaziwa kanti ngonyaka owedlule kubulawe usihlalo wamakhosi eKing Cetshwayo Local House, Inkosi Hlanganani Biyela naye owasocongwa ngabantu abangaziwa.

Lezigameko ziyaqhubeka nokudala itwetwe kosopolitiki kanye nakubaholi bendabuko njengoba lezigilamkhuba zisazihambela nje emphakathini.

U-Zikalala uthi kufanele kuphenywe kabanzi ukubulawa kwabaholi bomdabu kanye nosombusazwe njengoba sekubukeka kwanda kakhulu.

powered by Advanced iFrame. Get the Pro version on CodeCanyon.