Uthaqa WePhasika Awukuvumeli Ukuthwala Utshwala Ezimotweni

By: Bright Ntuli

UNgqongqoshe wezokubusa ngokubambisana, uNkosazana Dlamini-Zuma, uthi ubhubhane iCOVID-19 luguqule impilo siko yabo bonke abantu emhlabeni jikelele.

UDlamini-Zuma usho kanje ngenkathi echaza kabanzi mayelana nezinguquko zokuvalwa kwezwe ngaphansi kuka level 1, njengoba kuza amaholidi ePhasika.

Ngonyaka owedlule azibanga khona izinkonzo zika-Gudi njengoba izwe lalivalwe thaqa, ngenxa yokubhebhetheka kwaleligciwane, kanti yize zivumelekile kulonyaka kodwa uMengameli uCyril Ramaphosa ubeke imigomo nemibandela.

UDlamini Zuma uthi ngenxa yalesifo indlela yokukhonza kanye neyokuzijabulisa ngalamaholidi ngeke ifane neyejwayelekile.

“Sicela kulonyaka abantu baye ezinkonzweni lezi abahlezi beya kuzo, kungabi khona lento yokuthi kuyahanjwa kuyiwe kude ngoba sisaba ukuthi lokho kungenza ukuthi lesifo sibhebhetheke kakhulu,” kuchaza uNgqongqoshe.

Khonamanjalo, uDlamini-Zuma uphinde wamemezela ukuthi kusukela kusasa kuze kushaye uLwesibili, kuzobe kungavumelekile ukuthwala utshwala ezimotweni.