Kusolwa Ingxabano Yomndeni Ekubulaweni Kwamalungu Amane

By: Zilungile Mkhize

Amalungu amane omndeni owodwa, asedutshulwa abulawa esigamekweni ekusolakala ukuthi ingxabano yomndeni, eMfume eningizimu neTheku.

Lesigameko esenzeke namuhla, sishiye umphakathi uthukile njengoba labo abaqothe lomndeni ngenhlamvu bengakabanjwa nje.

Okhulumela amaphoyisa uRobert Netshiunda uthi okwamanje izinkomba zithi lokhu kuhlasela kuhlobene nengxabano yomndeni, yize kungakacaci ukuthi imayelana nani.

Uthi bazozama ngayoyonke indlela ukuthola ukuthi lokubulala okuhlasele kulomuzi, nosekuvele ukuthi akusikho okokuqala kumayelana nani, ukuze bezokwazi ukubopha ababulali.