By: Zilungile Mkhize
Unobhala -jikelele we-ANC, uFikile Mbalula, uthi unyaka ka-2026 uzoba unyaka obalulekile kulenhlangano wokulungisa omasipala abahlulekayo ukusebenza ngendlela efanele, nokwenza ngcono ukuhlinzekwa kwezidingo kubantu.
I-ANC ihlela ukugxila ekuthuthukiseni izidingongqangi ezifana namanzi, ugesi, imigwaqo nokuthuthwa kwendle.
UMbalula usho kanje ethulela abezindaba imiphumela ye-Lekgotla yesigungu esiphezulu se ANC kuzwelonke.
Uthi ithemba lezakhamuzi ngohulumeni wentando yeningi emazingeni asekhaya, lingakhula uma kubonakala iqhaza nemisebenzi yabaholi yokuhambisa intuthuko emphakathini, kuliwe nanenkohlakalo.
“Ilekgotla isithathe isinqumo sokujuba amathimba ayisipesheli komasipala abaseqhulwini kanye nasezikhungweni ezahlukene azobhekelela ukulethwa kwezidingo zomphakathi. Kanti i-NEC Lekgotla isiphinde yaqinisekisa ukuguqulwa kwezomnotho, izimboni, kanye nokwakhiwa kwamathuba emisebenzi,” kubeka uMbalula.
