By: Zilungile Mkhize
UNgqongqoshe wezemfundo eyisisekelo, uSiviwe Gwarube, uthi uhlelo olusha lwemithetho ebhekele ezokuphepha ezikoleni, iSafe Schools Protocol, luza nezinguquko eziningi zokulwisana nodlame ezikoleni.
Loluhlelo olwakhiwe ngokubambisana namaphoyisa luzoxhumanisa izikole neziteshi zamaphoyisa eziseduze futhi lusungule namakomidi ezokuphepha azosebenzisana nezikole kanye nomphakathi.
Lesinyathelo silandela ukwenyuka kwezigameko zodlame ezikoleni, ukubulalana kwabafundi, ukuhlaselwa kothisha yizigebengu nokunye. Ungqongqoshe uGwarube uthi balindele lukhulu ngaloluhlelo.
UGwarube uveze izibopho ezinhlanu ezibalulekile ezinhlelweni zezikole eziphephile, okuhloswe ngazo ukuqinisa ukuphepha kubafundi nothisha.
Uthe ke isikole ngasinye sizoxhunywa nesiteshi samaphoyisa esiseduze futhi sisekelwe yiKomidi lezokuPhepha esikoleni nelizobe lihlanganisa uthishanhloko, isigungu esilawula isikole kanye namaphoyisa.
