By: Sthulile Mdletshe
Abameli babasolwa abane (4) ecaleni lokubulawa kwanozinti weqembu lebhola lezinyawo i-Orlando Pirates uSenzo Meyiwa, sebeveze ukuthi bahlela ukufaka isicelo sokuthi kuhoxiswe wonke amacala ababekwe wona.
Bonke abasolwa kulelicala bayawaphika amacala ababekwe wona bethi babhecwa ngaleli cala ngenhloso yokuvikela ababulali bangempela.
UMeyiwa wadutshulwa ekhaya kubo kantombi yakhe uKelly Khumalo eVosloorus eGauteng ngo-2014, kanti namanje akukacaci ngokwenzeka njengoba ababekhona endlini baveza imibono engafani.
Izolo uMbuso uveze ukuthi usufike esigabeni sokugcina sokwethula ubufakazi, kanti usuyayideda inkundla kubameli babasolwa kulelicala.
U-Advocate Charles Mnisi, ongummeli kammangalelwa wesithathu, uMthobisi Mncube uthi bayalelwe ukuthi bafake isicelo sokuthi amacala ahoxiswe ngaphansi kukaSection 174 weCriminal Procedure Act.
