By: Zilingile Mkhize
INkantolo eNkulu ePitoli isiyalele lowo owayengumengameli uJacob Zuma ukuthi akhokhe imali engaphezulu kuka 28.9-million wamarandi eyayikhishwe umbuso ngokungemthetho ukukhokhela izindleko zecala lakhe lenkohlakalo.
IJaji u-Anthony Millar linqume ukuthi kumele uZuma akhokhe ngisho nenzalo yemali yombuso.
Uma le mali ingakhokhiwe ezinsuku ezingu-60 ezizayo, inkantolo isikhiphe umyalelo wokuthi kushaqwe impahla kaZuma idayiswe, okuhlanganisa nempesheni yakhe njengomengameli.
Ummeli wombuso useyalelwe ukuthi abike njalo ngekota ngenqubekelaphambili mayelana nokukhokhwa kwalemali.
