By: Buhle Mbhele
Undunankulu wase KZN uThami Ntuli uthi okwamanje abukho ubufakazi obuqinisekisa ukuthi ungqongqoshe wezemfundo uSipho Hlomuka, unesandla enkohlakalweni ekusolakala ukuthi ikhona ohlelweni lokukhishwa kwamathenda okuhambisa ukudla ezikoleni.
UNtuli uthi yinye kuphela indlela engaqinisekisa lokhu, ukuthi uma kungaphumela obala esinye sezikhulu emnyangweni kaHlomuka siveze ukuthi wawukhipha umyalelo wokuthi yiziphi izinkampani ekumele zithole amathenda.
Usho lokhu esithangamini sabezindaba eThekwini namhlanje.
Ngenyanga kaJuly, kwasabalala izinsolo zokuthi uHlomuka uyabandakanyeka ekubambezelekeni kokuphothulwa kwethenda lokuhanjiswa kokudla ezikoleni ngoba efuna ukulawula ukuthi iziphi izinkampani ezizothola lelithenda.
UNtuli wabe esecela uHlomuka ukuthi abhalele ihhovisi lakhe achaze uhlangothi lwakhe ngaloludaba.
