By: Xolani Khumalo
I-Build One South Africa (BOSA), ithi izobhalela uSomlomo wePhalamende uThoko Didiza imucele ukuba aphoqe uMengameli wezwe uCyril Ramaphosa ukuthi aphendule umbuzo awubalekelile ukuwuphendula ephalamende.
UMengameli uRamaphosa izolo bekumshubele njengoba ebephendula imibuzo ebivela kumalunga ephalamende mayelana nesimo sezwe.
URamaphosa ushone ezintangeni ebuzwa umbuzo umholi we-BOSA uMmusi Maimane mayelana nokuthi ngabe ukuthanjiswa kwemithetho ye-B-BBEE okuhlongozwayo nokuzovulela iminyango izinkampani zaphesheya ezifana no-Starlink zingene zisebenze kuleli, kuzozihlomulisa ngendlela efanayo yini izinkampani zalapha eNingizimu Afrika?
Oyisikhulumi seBosa uRoger Solomons uthi uMongameli akawuphendulanga lombuzo ngendlela egculisayo.
